Artesanía no Prato en Casa de Galicia.

Artesanía no Prato é un proxecto da Fundación Artesanía de Galicia que desde 2013 favorece colaboracións e converxencias entre artesanía, deseño e gastronomía a través de diversas accións como showcookings, feiras ou publicacións. Desta volta, o proxecto tomou forma de exposición na Casa de Galicia en Madrid, a sede institucional da Xunta de Galicia na capital.

O deseño expositivo concibiuse estratexicamente para superar os desafíos do espazo e favorecer a visibilidade das pezas. A sala-auditorio foi vestida con bandeiras de gran formato para crear un ambiente visualmente envolvente; e os paneis expositivos da planta superior expuxéronse como elementos de comunicación esenciais para contextualizar o labor creativo de artesáns e cociñeiros.

En conxunto, o deseño opera como unha ferramenta discreta que subliña a calidade, a tradición e a innovación da artesanía galega que dá soporte á gastronomía. O produto artesán é o verdadeiro protagonista dunha exposición que traslada a Madrid a excelencia do feito a man.